نصائح لأصحاب شعبة الفيزياء و علوم الحياة و الأرض من أجل النجاح بنقطة جيدة في الامتحان الوطني :
- الا كانت عندك نقطة ناقصة في الجهوي اذن عليك تعوضها في المراقبة المستمرة خصك تركز على المواد لي عندها معامل كبير ( الفيزياء الرياضيات علوم الحياة و الأرض الفرنسية ) ولكن ماتنساش المواد الأخرى لي قد تعوضلك شي مادة و الانجليزية و الفلسفة لي عندك في الوطني
دابا غادي نقوليكوم كول المادة و طريقة المعاملة معاها حسب تجريبتي الخاصة يعني تقدر تكوون عندك طريقة حسن مني
- الرياضيات كتعتبر أسهل مادة في الوطني حيت ديما الامتحان كاتحط على نفس المنهجية و هاذو هوما الدروس لي موالفين ماتحيطهومش
- المعادلات التفاضلية
ـ الدوال المثلثية
ـ اللوغاريتم Log ( ليس اللوغاريتم النيبيري Ln )
ـ الجدور من الرتبة n
و كانقولك ركز على الدوال مرة مرة جبد شي وطني و خدملوو الدالة ديالوو و الدروس لوخرين راهووم ساهلين هي خص شويا ديال الخدما و صافي .
- الفيزياء آآه هنا جينا المعقول كيما كنعرفوها الفيزياء مادة لي هي صعيبة و خصها الخدماااا بززاف و هي لي غادي تخصصلها الوقت ديال المراجعة الأكبر و كنصحك تشوف الدروس في مواقع بحال baclibre.ma و bactv.ma قبل ماتديرهوم مع الساد باش تكوون ديما أجوور و لا مفهمتيش شي حاجة عاودها و خدم التمارين بكثرة و فاش توصل الميكانيك تما خصك ثزيد من الوثيرة ديال الخدما ديالك لأنها شوية صعيبة و غادي تلاحظوو أن الأستاذ كيطيير لأن دروس كثار و الوقت قليل ,
- علوم الحياة و الأرض هادي المادة لي كيعتبروها بززاف ديال التلاميذ مادة للحفظ بالدرجة الأولى
بل العكس راه الفهاما هي اللولا عاد الحفاظا فهم الدرس ديالك مزيان حاول دووك التجارب لي كايكونو فالدفتار تفهم شنو الهدف ديالهووم و فالتالي دير شي ملخص خاص بيك كترجعلوو ديما حتى يتحفظلك و فاش يكوون عندك شي فرض صاوب شي مقالي كيشمل الدرس كامل و هاكا غادي تكون فرعتي الدرس اما بالنسبة للتمارين التحليلية فهي كاتكوون متعلقة بشي فقرة من الدرس يعني تكون فاهم الدرس كامل راه غادي تجاوب عليه بسهولة .
- الفلسفة :كنصحكووم تشيرو واحد الكتاب زوين كايدير شي 12 درهم نسيت سميتوو لونوو وردي
و كنصحك المنهجيات تفهمهوم مزيان و تعرف راسك شنو غادي دير و ركز على 3 مجزؤات لأن ضروري غادي تحطلك شي وحدة لي فاهمها مزيان يا اما في النص و لا السؤال و لا القولة .
- الانجليزية لا كونتي ضعيف فيها هي بلا متخلع راه كتحط ساهلا خاصك هي تخدم العام على vocabulary و تفهم النصوص مزيان و تعرف المنهجية ديال الوطني و الدروس ديال grammar راه ساهلين غادي يتفهمولك دغيا و شووف فالموقع 2b2bi.com دروس مشروحين ناضيين .
و لي بغا شي حاجا هاني موجود
و شكراا و الله ينجحكووم أخوتي
موضوع: نصائح لأصحاب شعبة الفيزياء و علوم الحياة و الأرض من أجل النجاح بنقطة جيدة في الامتحان الوطني 
الإثنين ديسمبر 23, 2013 10:34 am
